இருள் இரவில் மட்டுமல்ல

(1)சிறுபுள்ளி இருதிசைகள் பரா வெளிச்சத்திலும் தெரிகிறது முகத்தில் படரும் துயரரேகைகள் ஓயா வெடிச்சத்தத்திலும் கேட்கிறது உன்குரல் " நாளை விடியாது " பிரிவு நிரந்திரமாயிற்று " வலி " கொதிக்கிறது அந்தரிக்கிற மனம் அந்த புள்ளியிலேயே குந்தியிருக்கிறது (2) அழியா நினைவுகளை பொக்கிசமாய் காவித்திரிபவன் சகாக்களை தொலைத்துவிட்டு பூமிக்கும் வானத்திற்குமிடையில் நடந்து திரிபவன் எழுதிமுடிக்கா கடிதங்களை மகாத்மாக்களுக்கு அனுப்பிவிட்டு பதிலுக்கு முகவரியற்று காத்திருப்பவன் (3) இரண்டாவது வாழ்க்கை இருப்பிற்கும் இழப்பிற்குமான வெளி இன்மையே பேசு பொருளாகிறது இடம்பெயர்வு என்பது இடர்பெயர்வது இல்லை இசையும் ஆறுதல் தருவதில்லை இதயம் இயந்திரமாகிறது இருள் இரவில் மட்டுமல்ல

இருள் இரவில் மட்டுமல்ல

எழுத்தாளர் மலரன்னை அவர்கள்

எழுத்தாளர் மலரன்னை அவர்கள் எழுதிய 275 ற்கும் மேற்பட்ட சிறுகதைகள் இதுவரை பிரசுரமாகியிருக்கிறது. இதில் முற்பத்தைந்திற்கும் மேற்பட்ட சிறுகதைகள் திறந்த போட்டிகளில் பரிசு பெற்றிருக்கின்றன. அதில் இருதடவைகள் சர்வதேச அளவில் நடைபெற்ற போட்டிகளில் பரிசு பெற்றிருக்கின்றன. இதுவரை 11 சிறுகதைத்தொகுதிகள் வெளியிடப்பட்டுள்ளன , இவற்றுள் 217 சிறுகதைகள் அடங்கியுள்ளது குறிப்பிடத்தக்கது. எழுத்தாளர் மலரன்னை அவர்கள் எழுதிய 40 ற்கும் மேற்பட்ட வானொலி நாடகங்கள் பெருவரவேற்புடன் ஒலிபரப்பாகியிருக்கிறது.இதில் பத்திற்கும் மேற்பட்ட வானொலி நாடகங்கள் திறந்த போட்டிகளில் பரிசு பெற்றிருக்கின்றன. அதில் இருதடவைகள் சர்வதேச அளவில் நடைபெற்ற போட்டிகளில் பரிசு பெற்றிருக்கின்றன. இதைவிட 43 அங்கங்களை கொண்ட " கனவுகள் நனவாகும் " என்ற ஒரு தொடர்நாடகமும் வானொலியில் ஒலிபரப்பாகி பெருவரவேற்பு பெற்றிருக்கிறது. இவர் எழுதிய முப்பத்தைந்திற்கும் மேற்பட்ட மாவீரர்களின் வரலாறுகள் உட்பட நூற்றுக்கும் மேற்பட்ட வானொலி நிகழ்ச்சிகள் தாயக வானொலியில் ஒலிபரப்பாகியிருக்கிறது.

எழுத்தாளர் மலரன்னை அவர்கள்

வீழ்ந்து கிடப்பது

நிழல் தந்த மரம் ஒன்றை கெட்டித்தனமாய் வெட்டி வீழ்த்தினான் குருடன் யார் சொல்லும் கேட்கவில்லை செவிடன் நாளை மூச்சுவிட முக்குவான் "மஹாதெனமுத்தா" மூடன் வீழ்ந்து கிடப்பது பசுமை தந்த மரம் மட்டுமல்ல பறவைக்கூடுகள் மட்டுமல்ல பகுத்தறிவும்தான்

வீழ்ந்து கிடப்பது

மலரவன்

ஒரு கையில் பேனா மறுகையில் துப்பாக்கி இரண்டிலுமே நீ சுமந்திருந்தது ஈழவிடுதலையை ! வார்த்தைகளால் நீ கோத்த கவிதைகள் யாவும் வெற்றுப் பாடல்கள் அல்ல காடுகளின் மடியில் கண்ணீரும் செந்நீரும் சிந்திய எம் மண்ணின் சாட்சியங்கள்! நீ எழுதிய 'போர் உலா' இன்னும் உலா வருகிறது விடுதலைப் பாதையின் கரடுமுரடான சுவடுகளை காலத்தின் நெஞ்சில் செதுக்கியபடி! இருபது வயதிலேயேஉன் ஆயுள் உதிர்ந்து போயிருக்கலாம் ஆனால் உன் பேனா சிந்திய மை மரணத்தை வென்று இன்றும் எரிகிறது எங்கள் விடியலின் தீபமாய்! மலரவன் என்ற பெயரோடு மண்ணில் வாழ்ந்த நீ மரணித்த பின்னும் மாசற்ற மாவீர வாசம்!

மலரவன்

எழுத்தாளர் சு.ராஜசெல்வி

படத்திற்கான கவிதைப்போட்டியில் சு.ராஜசெல்வியின் சுமார் 280 கவிதைகள் ஈழநாதத்தில் (வெள்ளிநாதம் ) பிரசுரமாகியிருக்கிறது . அதில் 40 கவிதைகள் பரிசுக்குரியதாகவும் மிகுதி பாராட்டுக்குரிய கவிதைகளாகவும் பிரசுரமாகின. சு.ராஜசெல்வி, ரா.சுஜந்தன் , எஸ் ஆர் எஸ் , சு.செல்வி, எஸ்.ஆர்.செல்வி, எஸ்.ராஜி ஆகிய பெயர்களில் இவர் எழுதியிருக்கிறார்.இப்போட்டிகளில் பலதடவைகள் ஒன்றுக்கு மேற்பட்ட கவிதைகள் பிரசுரமாகியிருப்பது குறிப்பிடத்தக்கது. இவரது சிலகவிதைகள் வானொலியில் ஒலிபரப்பாயிருக்கிறது.இவர் நிகழ்வுகளிலும் கவிதை வாசித்திருக்கிறார். முகநூலுக்கூடான அகில உலக ரீதியான போட்டிகளில் கவிதைகளுக்காக, புகைப்படங்களுக்காக, சிறுகதைகளுக்காக ஐம்பதிற்கும் மேற்பட்ட வெற்றியாளர் சான்றிதழ்கள் பெற்றிருக்கிறார். இவரது முப்பது விஞ்ஞானக்கட்டுரைகள் போர்க்காலத்தில் கிளிநொச்சியில் வெளியான "விழி " மருத்துவ இதழ்களில் பிரசுரமாகியிருப்பது குறிப்பிடத்தக்கது. இவர் எழுதிய "கைவிளக்கு" என்ற சிறுவர் நூல் 2010 ஆம் ஆண்டு வெளியாகியிருந்தது. கொரோனா காலத்தையொட்டி "ஜீவநதி" இதழ் அகில உலக ரீதியாக நடாத்திய கவிதை போட்டியில் தெரிவான கவிதைகளின் கவிதைத்தொகுதியிலும் இவரது கவிதை இடம்பெற்றிருக்கிறது. " தடாகம்" அமைப்பு 2018 ஆம் ஆண் டு உலகம் தழுவிய ரீதியில் 2018 ஆம் ஆண்டு நடாத்திய கவிதைப்போட்டியில் மூன்றாம் இடத்தை பெற்று "கவின்கலை" பட்டத்தையும் பெற்றார். பாடசாலை வாத்திய அணியில் melodica வாத்தியத்தை வாசிப்பவராக இருந்திருக்கிறார்.1998 ஆம் ஆண்டு கிளிநொச்சி புனித திரேசா பெண்கள் கல்லூரியின் "வளர்பிறை" கையெழுத்துச் சஞ்சிகை வடகிழக்கு மாகாணத்தில் பாடசாலை சஞ்சிகைகளுக்கான பிரிவில் இரண்டாம் இடத்தை பெற்றது, இவர் அச்சஞ்சிகையின் ஆசிரிய ஆலோசகருக்கான சான்றிதழை கல்வித்திணைக்களத்திடமிருந்து பெற்றார்.இவர் ஒளிப்படங்கள் எடுப்பதிலும் ஆர்வமுள்ளவர். svartsol12.blogspot.com என்ற வலையிணையத்தில் நோர்வேஜிய மொழியிலும் கட்டுரைகளை எழுதியிருக்கிறார். தாய்நாட்டை விட்டு புலம்பெயர்ந்த பின் தமிழ்பாடசாலையொன்றின் ஆசிரியர்களில் ஒருவராக கடந்த பதினைந்து ஆண்டுகளுக்கு மேலாக பணியாற்றிவருகிறார்.

எழுத்தாளர் சு.ராஜசெல்வி

துடைத்துவிடும் கைகள் இன்று இல்லை

கண்ணீர் விடுகையில் துடைத்துவிடும் கைகள் இன்று இல்லை என்பது கண்களுக்கு தெரிவதில்லை

துடைத்துவிடும் கைகள் இன்று இல்லை

ஒப்பாரி தான் வேறொன்றுமில்லை

விடுதலை வேண்டிய மக்களை கொன்று குவிக்கும் குண்டுகளின் சத்தம் உலக மனச்சாட்சி செத்ததிற்கான ஒப்பாரி தான் வேறொன்றுமில்லை

ஒப்பாரி தான் வேறொன்றுமில்லை